الموضوع: سجّل يومياتك ..

يسلمووو اختي همى يعطيك العافية وكل سنة وانت بالف خير

وإنتِ بألف خير ..

اليوم / السبت
الساعة / 3 إلا عشر
المكان / البيت
الحالة المزاجية / عادي يعني لا بأس ..
طبعاً العيد مو مكتمل لأني مفتقدة ناااااااااااااس وايد
منهم أخوي مو معانا .. يعني موشي .. حتى مو قادرة أكلمه
بس ها في أشياء سهلت الأمور ..

بأخبركم كيف كان العيد من الساعة 4 فجر للحين هههههه

الله يسلمكم صار لي كم يوم أستقبل رسائل العيد وما أرد!!

واليوم من الساعة 4 ناهضة كأني مغيبة وقلت صار وقت الإزعاج!

وأدز حج الكل ما بقيت حد وطبعا مسج من تأليفي هه

بعدها نهض الكل وسلمت ع أمي وأخواني ..

وبعدها / من عادة عائلتنا الكريمة وقبل صلاة العيد وقبل كل شيء
نطلق المدافع .. بعدها نروح نسلم على خوالي وجدّي وجدّتي
وكل الأهل القريبين من البيت !! هذا قبل الصلاة .. شي لا

بعدها جيت أجهز المجمر حج أخوي الثاني عشان نبخره ونعطره هههه
عشان يروح الصلاة .. ولأني كنت مريضة نوعاً ما!

عفوني من أعمال المفروض أسويها وعاد ما طلعت الطقم غير شوي ههه

بس أترايهم عقاب حالي مخليني أكوي كل ملابس أخواتي هههههههه

شفتوا كيف!! بس تراني طيبة وكويت ..

بعد صلاة العيد أتصلت بالوالد لانه بعيد عن الديرة وهنيته ..
وبعدها جا زوج اختي وأخوي وعملوا الجريمة هههه
قتلوا وذبحوا المسكين التيس وهو يبكي إمباع إمباع ..

طبعا بعدت عن ذاك المكان .. وكل مرة أحد يجي يسلم
من الأهل يعني كنت استقبل واسلم .. بس تو راحوا
ولقيت نفسي هنا ..

وهذا طبعا في أحداث نسويها في العيد منها المشاكيك واللحم المشوي
وهذا كله بكرا من نذبح التيس الثاني !!

بكرا بنقل لكم أحداث الغد ..

والحين اقول لكم كل عام وأنتوا بألف خير ..

ومساء البرد ..... يؤؤؤؤؤؤؤؤ برد × برد

اليوم / الانثين
الساعة / 11 وكمين دقيقة
المكان / البيت
الحالة المزاجية / زحمة وزعل بنفس الوقت ..
آه .. قبل كم ساعة قرر مجلس العيلة الذهاب للبحر..
لكسر الروتين .. عاد ما ركضت أنا .. لكن
السيارة ما كفت !! ياربي من جيت أنا!!
ضحكت وجلت أوكيه أردها لكم ها ها ها ..

وبكرا بتريا ربيعاتي شيات والله ..
ولكن ضحكني أون يبن مني أدش المطبخ وأطبخ ههههههه

جلت تعالن ويصير خير .. يحلمن يذوقن طبخي ههههههههههه

فيني ضحكة .. براويهن .. كيف الطبخ ..!!
ربيعات الدراسة ,, مشتاقة لهن كثير ..
مو مشكلة بسوي لهن سندويشات تونة هههههه
أسهل طبخة عندي !! بعد مو زين اللحم ..

أغير روتين المعدة شوي ..

وهذا وبالعافية أترككم ..

صباااااااااااااح التفاح ..

اليوم / الاربعاء
الساعة / 12 ضبط
المكان / البيت
الحالة المزاجية / الحمدلله شيات ..
خصوصا أمس كان ربيعاتي هنا من العصر معاي
لين الليل .. تفولنا وتعشينا وسولفنا ههههههههه

شيات وايد .. صارت سالفة باخبركم عشان تضحكوا..

أسميهن أنهن شي ..

وحدة منهن تبي تنكت بالثانية دزت لها مسج
تبي سلف 200 ريال !! عشان العيد
وتكملت المسج انه سكران يكلم الآله الصرف هه

وذيك الغبية ما كملت قراءة المسج
ردت على الثانية وقالت الظروف صعبة
وما عندي سمحي لي .. هاهاهاها

وذيك العفريتة هههههه أستغلت عدم فهمها

وقالت لها / أفا ما كنت أظن تردين !!

وذيك ردت عليها / غيبي عني ما عندي شي
الله يعطيك ويعطيني واااااااااااي .. زطيات ههههههه

وعاد ردت عليها روحي عند همى إللي هي انا
يمكن تعطيك ههههههههههههههه

وبعد يوم ذيك أكتشفت تكملت المسج ..

ولما ألتقن معي انا فاشت الضرابة هههههه

وانا أضحك ..

كان جو عائلي حلو هن مع أمي وأخواتي
شيات وما حسينا بالوقت ..

وأتفقنا كل مرة نطب على حد زيارات
عشان نأأأأأأأأأأأأأأأأأأكل ..

وهيك كان أمس ..

وحياكم الله

صباح الورد..

كالعادة من البيت وحالياً الساعة 12 وربع صباحاً
والحالة المزاجية / الحمدلله بس كأنه وايد برد
حتى أكح من البرد!!

اليوم كان شي حافل يعني .. لأنه كان هنا ..!
أبوي كان هنا طبعاً بداية اللقاء كالعادة قبلة على الرأس
تليها قبلة على اليد ، هنا أذكر يوم كنا صغار من الصباح
نطق باب الغرفة عشان نسلم ونصبح على أبوي
ونبوس رأسه ويده .. شي يعني كيف نبين
احترامنا حج ابوي ..اليوم من بعد صلاة العشاء
لساعة 12 رمسة وسوالف مع أبوي ..

اليوم تعمقت في أبوي أكثر وأكثر .. كيف عقله كبير!
واسع جداً ..
لا أخفيكم كل قصص الأنبياء استوعبتها من عنده!
اقرأ القرآن وأنا فاهمة عشان هو وضح لي المعاني !

اليوم أبحرنا انا وهو وبقية أخوتي .. أبحرنا في عمان
وتغزلنا بها وحمدنا الله على قائدنا .. هنا أبوي
كشف ورقه لنا .. أخرج كتاباتهُ !! كنت أعرف أنه
يكتب .. ولكن لم أعرف انه كتب عن عمان ..
وما كنت أعرف أنه كل كتاباته محتفظ فيها!!
قرأنا كتاباته .. أخرجها وأعطاني مذكرات كتاباته!
مسك على يدي ! وقال احتفظي بها .. بعد عمر طويل..

هنا بكيت أنا / طبعتُ قبلة على رأسه وقلت اطال الله في
عمرك ابي .. كبير هو ابوي الشيب يملأ وجهه !
أحب لحيتهُ البيضاء .. أحب مداعبتها!

من ثم حكى لنا كيف كان .. عند كل مساء يعود
من العمل .. يشعل الفتيل ويقرأ ويقرأ ليثقف نفسه
هكذا وصاني ! .. هكذا أفتخر به كثيراً ..
غرقنا اليوم في كل البحار .. تكلمنا على أصل
مذهب الأباضة .. كيف ابي يعرف الكثير..
كيف بدأ وكيف وصل عمان ..
لنذكر مازن بن غضوبة واسلامه .. لندعو الله
ان يحمي عمان وقائدها .. ليأتي موسى عليه السلام
هو وقومه .. لنسافر إلى سبأ .. حيث كانت بلقيس
ليحكي تفاصيل مع حدث ..

لنتكلم عن أسماء الشيطان ومهام كل شيطان ..
كل شيطان له عمل معين ليلهي الناس عن العمل !

ليذكر لنا قصة قرأها منذ كان صغير ومازال يذكرها
قصة المياسة والمقتداد وكيف كانت المياسة جميلة
ويذكر حوار الشعر بينها وبين المقتداد!! رائعة

لنعود إلى الحبيب المصطفى عليه السلام ..
ولا ننسى فاطمة الزهراء ..

لنعود مرة أخرى لكتابات أبي .. وانا اصفق له
وهو يذكر بالتحديد الفترة الزمنية لكل نص

سأحاول أن أدرج هنا بالنبض بعض كتابات ابي ..

كان ابي هنا .. لأراه أكثر وأكثر ..
لأسعد بمذكراته التي أعطاني إياها ..

مشاعر اليوم طلعت .. حلو اليوم 100%
فشكراً لليوم ..

وشكراً لانكم تقرأوا يومياتي