الموضوع: كيــف نجعــل منتـدانـا هـو الأفضـل...؟؟؟

][®][^][®][... الســلام عليكــم ورحمــة اللّــه وبــركـــاتــه ...][®][^][®][

في البداية أنا قريت هالموضوع وحبيت أييبلكم إياه على شان تقرونه والكل يستفيد من اللي فيه


ماهو المنتدى ؟!! ..

المنتدى هو بيتك الرابع وفية اصدقائك واخوانك يشاركون معك في المعرفة وفي المزح ويزعلون لزعلك ويفرحون لفرحك
وفي هالوقت كثرت المنتديات وصار هناك سباق للمنتديات وكل عضو يتمنى أن منتداه هو الأفضل ويتفاخر بين أصداقائه بهذا الشئ ..


فكيفك نجعل منتدانا هو الأفضل ؟!!


الحل بسيط ..


اولاً : (( تشجيع الأعضاء الجدد ))


هذي هي البداية وأنت أكيد تتذكر أول يوم دخلت فية للمنتدى وكتبت موضوع وكم تمنيت يرد علية الكل ،، وبتشجيعنا للأعضاء الجدد فنحن نحثهم على الأبداع فمنهم سيخرج لنا كتّاب رائعين في الأدب والشعر وكتاب متميزين في الصرقعه أو في أي مجالات آخرى والعضو الي دايم يكون الأول في الترحيب ,, حبيب وقلبه طيب ,,


ثانياً : (( قبل أن تكتب أي موضوع في أي قسم معين يجب أن ترد على موضوعين أوثلاث أو أكثر ))

وهذا شئ مهم جداً ،، لأن هذا تواصل بين الأعضاء وتشجيع لهم وأي عضو يفرح بكل رد على موضوعه ويحثه على الأبداع أكثر فاكثر وأنت إذا رديت على مواضيعهم الكل بيرد على موضوعك إذا كان يستحق .. والعضو إلي دايم يرد على المواضيع يسمى ,, محبوب الكل ,,



ثالثاً : (( تشجيع المواضيع التي يكتبها اصحابها ))

أن تكتب أنت موضوع بجهدك أفضل مليون مره من نقله أو نسخه من منتدى ثاني فالمستفيد الوحيد هو صاحب الموضوع الذي كتبه بجهده ولأنه موضوع رائع فالكل ينسخه وينشره في كل المنتديات ،، أكتب فكره أو معلومه أو انقل من كتاب أو مجلة مايستحق النشر والعضو الي دايم يكتب مواضيعه بنفسه ,, هذا نشيط ومتميز ,,


رابعاً : (( الكلمة السحرية ))

وهي أن تكتب كلمة ( شكراً على هذا الموضوع ) كلمات قليله ما اتعبك أو تنقص من قدرك او كبريائك المزيف ،، واااايد مانشوف مواضع عدد قرائها فوق السبعين أو الثمانين ومن هولاء فقد يرد على صاحب الموضوع واحد أو ثنين وأكثر الأحيان تجد الموضوع خالي من أي رد ..!!
يعني أنته تبغي الكل يرد على موضوعك وأنت ماتكلف على عمرك وتقدر تعب صاحب الموضوع .. عيل اشعنه تشارك وتعب عمرك ويسمى العضو الي دايم يشارك ويحث الاعضاء على المشاركه ,, ياحبي لك ,,



خامساً : (( محاربة الشليلة ))

وهذا أكبر خطر يهدد أي منتدى وااايد من المنتديات شردوا منها أعضائه لهذا اسبب ،، وشليلة هي أن يتفق الأعضاء ويقولون ( احنا والله شله ارتحنا لبعض ومانبغي واحد يديد يكون بينا ،، والاتفاق هو ترد على موضوعي ارد على موضوعك ) ويروح فيها الضعيف ( العضو الجديد ) مايعطونه ويه لين يمل وينسحب من المنتدى ،، لا ومن زين الطبايع بعدها بفتره ينجلبون على بعض ويكون كل واحد يكتب موضوع ولا يرد على الثاني ،، وخلاص انتهى المنتدى وصار ممل واحسن إنه يتقفل ويسمى العضو الي جذه ,, قريح الطواعين ,,



سادساً : (( التواصل بين الأعضاء ))


التواصل بين الأعضاء في الأفراح نهنيهم وفي الأحزان نواسيهم ( عاد تخيل نفسك مريض أو مسافر حتى أهلك مادروا عنك ،، وأتي للمنتدى ولكل مشتاقين لك ويسألون عنك ،، أكيد بتشقق من الفرحه ومحد قدك )
ويسمى العضو الي دايم يسأل عن الاعضاء ,, ياطيب القلب وينك ,,


سابعاً : (( التقليل من المواضيع المنقولة ))

بعض المواضيع مهمه ويجب أن تنقل وتنتشر في كل المنتديات ،، لكن مسألة أنك تشوف أي موضوع يعجبك وتنقله لا ويمكن يكتب عشر مواضيع في اليوم ( تخصص قص ولصق ) هذي شئ يطفش( عيل اشعنه اشترك في المنتدى !! ..عيل أقرأ جريده أو مجله أو أتابع الأخبار في التلفزيون أبرك لي) ويسمى هذ العضو ,, مخربها ,,


ثامناً : (( لاتصير خفيف وثقل ))

أييك عضو يكتب كل يوم عشر مواضيع وفي كل قسم يحط له ست مواضيع من زود الفضاوه ،، ويالله يالله نرد على نص مواضيعه وما نلحق وهذا يسمى العضو ,, الغثيث ,,



تاسعاً : (( التقليل من المشاكل وحوادث السيارات ))


يعني ثنين تضاربوا وقلبوا المنتدى فوق حدر ونقسم المنتدى الى حزبين وكل واحد معه شلته أو أربيعه
( ياخي بينك وبين أي عضو مشكله او رده ماعيبك أو لك ملاحظة ،، طرش له رساله خاصه وتفاهم أنت وياه بدون مايدرون الأعضاء ) يعني ماله داعي هالإحراج ويسمى العضو ,, المشكلجي ,,



عاشراً : (( خلك ذرب يالمطفوق ))

أيي عضو ويتعب ويكتب موضوع جاد ومهم ويتوقع ان بيرد عليه ويناقشة الكل بعدين أييك هاك العضو الي مايدري وين الله حذفه ويرد رد مثل ويهه ،، الموضوع في شمال وهو يرد شرق ،، ويخرب الموضوع او يقلبه جات ( شات )
( المواضيع الجاده والمهمه تحتاج الى رد جاد وبعكسها المواضيع الساخره أو المصرقعه يرد عليها برد ساخر أو مهبول )
ويسمى العضو الي يرد برد في جهه والموضوع في جهه ,, حويل دجه ,,


.. وأخيراً ..

المنتدى ليس بعدد أعضائه ،، بل بترابط أعضائه كلأسرة الواحده وكما قال رسول الله عليه أفضل الصلاة والسلام (( مثل المؤمنين في توادهم وتعاطفهم مثل الجسد إذا اشتكى منه عضو تداعى له سائر الجسد بالسهر والحمى )) وقوله عليه السلام (( المؤمن للمؤمن كالبنيان يشد بعضه بعضا )) ..