ومساء العيود
وكل عام وأنت أخوي العزيز يا وحش
وايام العيد أكيد جميلة جداً
لها ذكريات رائعة
وأحب العادات عندنا كثير كثير..
خصوصا بأول يوم ..
تدري شو نسوي نحن..؟
بعد صلاة الفجر نسمع أصوات البنادق
شيات طلقة ورا طلقة
نرحب بالعيد
كذا قبل صلاة العيد بساعة
تدري شو نسوي..؟
بعد طبعا ما نسلم على بعض بالبيت امي واخواني
نطلع حج أهلنا قبل لا نلبس حتى
وقبل لا يروح الرجال صلاة العيد
نسلم على أهلنا القريبين منا
نسوي شارع أحد يدش وأحد يطلع
ونسلم على بعض
جدي وجدتي نسلم عليهم والكل
وهذا العيد شيات طلعنا وسلمنا على جدتي
وخالي قدامنا ونحن وراه نروح نسلم على جدي
طابور ههههههه شيات والله
نبوسه قبل من فوق الرأس بعدين نبوس يده
ونهنيه شيااااااااااااات
بعدها كل احد يرجع بيته
ويبدأ الرجال بالتجهز لصلاة العيد
وعاد انا فديتني احب اسوي شي
اجهز البخور والعطور حج أخواني
عاد يلبسوا ويتعمموا ..
وانا ماسكة المبخار
اقول طابور ابخركم واعطركم
احب ابخرهم واعطرهم
بعد ما اعطرهم وابخرهم
يبوسواا رأسي ( أختهم العودة فديتني )
أقول لهم كلمة اسمعها من أمي
(الله لا اصغركم فديتكم )
بعد ما يروحوا هم
نجهز الفوالة .. نخليها جاهزة
وعاد انتظر خواتي لين يلبسن بعدها ابخرهن
وانا اكون الأخيرة دائماً..!
أشوفهن هن لابسات كأني أنا لبست خلاص..
عاد نزور بعض ونشوف بعض مرة ثانية
ونستقبل اليهال للعيدية
وهيك ..
أحب هذا الجو كثير كثير ..
ومن ذكريات الطفولة إللي مستحيل أنساها...!
كنت بالصف الرابع الابتدائي
ورايحة أتعيد مع بنات خالي
وكنت أطول وحدة فيهن..!
ولو تتذكروا نصي دراما الموت ..!
تكلمت عن أم عادل ( وام عادل اسم مستعار )
ولكنها امرأة موجودة في بيئتي ..
كنت رايحة أتعيد .. قامت نازعتني
وقالت إيه أنتي صرتي كبيرة لا تجي تتعيدي مرة ثانية
وعطتني كمين بيسة وقمت ورميتهن..!
ومنهاا ما رحت اتعيد ..
كلامها كان سم .. بكتني
وخبرت أمي .. وامي عصبت فديتها..
بس .. من أشوفها أخاف
هههههههههههههههه
بس ذكريات كثيرة مع العيد ..
وغير الأيام التابعة للعيد ..
من ذبح ومشاكيك وشوا ..
وجو عائلي حميمي .. أحبه وأشتاق له ..
وهيك يا أخوي ..
ومن العايدين آآآآآآآآآآآآآمين