.
العبارة
مع نهاية ثرثرتي
لن اغفل أبدا عن حدث يؤرقني
ألا وهو حادث العبارة التي راح ضحيته
ابرياء نتيجة الاهمال وتقاعس الجهات المختصة
في ميناء سفاجة بالبحر الاحمر
:
يا بحر قاسي
ما كنت هادي.. وكنت راسي
يا بحر قاسي
انا جاي اعاتبك .. انت وقروشك
جاي اعاتبك ولو اني عارفك
سِمَك .. ونارك ... اللي يدُوسَك
يا بحر سِحر
حلو بجمالك
حرير ولون .. وموج بيلمع
لكن يا بحر .. ساعة جنانك
تقفل ودانك .. عشان ما تسمع
تصحى بوحوشك .. تاكل وتبلع
ساعة جنانك مين يحوشك ؟
:
يا بحر قاسي .. ما كنت راسي
ضاعت في موجك
عبارة شايلة أهلي وناسي
إن قلت ألومك .. واشجب هجومك
يشت .. عقلي من جوه راسي
عبارة سَموها السلام
من بعد سالم ... غرقت كمان
والخلاصة من الكلام
كان ياما كان
فيه شوية ولاد حرام
اللي ناطورجي .. واللي عطشجي
واللي وراه حتة مدام
البيساريا ( سمك صغير ).. قبو حيتان
البيساريا اكلو الميدان
بالفلوس . والنفوذ .. والصدور والخمور
بالسياسة .. والكياسة .. والرياسة والفجور
من وكالة لـ 100 وكالة
النعش سالم ( العبارة )
كان أصله شايب .. منظر يا دوب
والسلام يا سلام
اسطول .. عجايب .. مليان عيوب
اسطول ومرمي في الزبالة
اجروله في الضلمة ونش
طلعوه واشتروه
والرخيص ما يسوى قرش
بالحشيش
والدماغ فوق المصاطب
الحيتان الاذكياء فكرو
من اقصر طريق يربحو
المصايب
آيفُو ( رَمِمُو ) اقدم مراكب
خبو سوسها والعناكب
زينوها بالكواكب
معجنوها .. دَوِكُوها .. دوكو غش
والحكومة
والنقابة .. والكباتن والرقابة
فتشوها .. وقيموها
زغرتولها عالربابة
الأمان مية مية
والردار .. مُواصفاتُه عالمية
والصناعة .. ( ميد ) في بَنما ..
فين بنما ديه ؟
في اسكندرية .. ولا الغورية
:
من غير ديباجة
خلينا نِوصف شُهرة سَفاجَة
من مراكب
من رصيف .. من أمان أي حاجة
مينا المكاتب والمهالك
شاطرين وبس
في الضرايب والجمارك
كله في مؤمرة
عمال يقلب عمال يهلب
الغلط قدام عنيهم
الغلط من الأصل فيهم
مين كبيرهم .. مي حاميهم ؟
مهما تشكي .. مين ها يسمع
احجز في دورك
اُهرش جيوبك ..... واتفضل ادفع
احجز في نعشك
واربط في عفشك .. أبصُم وِوَقع
في السلام .. شعار تمام
إلى الأمام .. تروح ما ترجع
مكتوب علينا في كل موسم
تبكي عنينا
ويا السواد في الحداد
في كل موسم
عَبَارة سَكة صواميلها فاكة
تغرق في بحر .. وابكي يا واد
ابكي يا واد
عالعجايز .. والشباب .. والحريم والولاد
الروح رخيصة
حظ اللي مات .. قدرُه ومات
كله تمام
السلام .. والسلامة
وده كلام التحقيقات
:
المَلام
عالبحر ياما
مرجانه نوعه مش كويس
عبارة ماشية
سايقها رَيس .. وفيها ايه لما تخيش
ولا تَوَلَع بنار بابور
ولا الطُرنبة من غير موتور
:
الشركة
الشركة.. دايما في السليم
اختامها .. دايما في السليم
سلام .. وسالم .. أو سليم
ناس بتلعب .. في القديم
ومدام سكتنا عالقديم
ومـ الحكومة
لا شوفنا سين.. ولا حتى جيم
تبقى القضية .. تعويضات
كام جنيه
للي استحمى واللي مات
يا مسؤولين
ليه تنادو بعقد جلسة
جلسة طارئة للنقاش
وقت ضايع .. لا .. بلاش
القضية .. حاجة تافهة
ارواح
وضاعت في البلاش
:
يحيى معوض
الارز