سماء صافية
أرض خضراء
نخيل بلادي يزجر حاضر اليوم
وين كنا وين صرنا ..؟
شو بقى من ماضي جداتي ..؟
غير مندوس محنط نزين به ركن بيتنا الحاضر
بقايا ياس وسدر وزعفران تعطر شيلة جدتي
ريحة حلوة لا مصنعة ولا مزيفة
ودهان الصندل باقي في جبهة جدتي
يحكي جمال الحرمة الأولية
لا بودرة ولا كريم أساس كان
وكحل يخلي ذيك العيون كأنها ليل
لا كان في مسكرة ولا مسخرة ولا آي شدوه
ومن الفجر الطوبيّ على ثلاث حجرات
وأمي وجدتي يخبزوا خبز الرخال
ويدهن بسمن بقرتنا
سمن عماني أصيل مية مية
من يد جدتي
وتبقى ذيك الخلاصة
إللي تحلى تمرنا مع صحن كامي
هيه .. ويكون الواحد بكامل صحته
مو أكل اليوم برجر وبيتزا
ونلقى بطونا كروش كأنها إستاد بوشر الرياضي
هيه .. هيه
وأتذكر عمامة جدي ودشداشته الأولية
وريحة تعب الصغر فايح
مو شباب اليوم كأنهم خبزة بـ لبن
لا قوة ولا شدة ولا حنكة ولا خبرة ولا فهم
كأنهم يهال يكبروا وما يكبروا
ويجي جدي بعقفاته ويعسفنا قوموا يا يهال
وقت الصلاة ..
وقت المزرعة ..
وقت حفظ القرآن تحت شجرة السدر
ويطيح النبق فوقنا ونغافل المطوع
ونأكلها وما نحس إلا بسوط الخيزران على ظهورنا
كل شي بوقته حلو
وكل شي يعودنا على النظام والأصالة
مثل قهوتنا الأصيلة وحلوانا الحلوة
وين وقتنا اليوم ..؟
بلاستيشن وكمبيوتر وانترنت .. ألخ
كل حد بروحه ما يدري عن غيره
ما أدري العيب فينا وإلا بالتطور ..؟
لو نطرد التطور .. كيف بيكون حالنا ..؟
نكون أحسن يا ترا ..؟
**
ومساء الأصالة يا غالب
هيك محاولة بسيطة أجاري عاميتك
والله يعطيك ألف عافية
هيك شهيتني على شي عامي عماني منك
نريد نسمع زيادة لا تبخل علينا
وحالك دست حلوى سلطانية
مع دلة قهوة مزعفرة بماي ورد جبلي
وكل عام وأنت بألف خير