فرق سنين
بيني وبينِك فرق سنين
لما بشوفِك
يجرو .. يدوبو في غمضة عين
:
روحِك .. حلوة
صوتِك . غنوة
وانا وياكِ
بنسى فـ لحظة هموم الدنيا
ويا كلامِِك
كلمة بكلمة .. بسمع عادي
اضحك .. واتكلم ... عادي
وارحب .. واسلم .. عادي
عادي فـ عادي
وأنا جوايا ... شي مش عادي
ويا كلامِك
قلبي بيرقص على أنغامِك
شيء مش عادي
كُلي فـ لَهفة .. واشواق ليكِ
شيء مش عادي
جوايا ثورة ..
أسئلة صعبة .. وتفكير فيكِ
:
نفسي
اخد خطوة واجري اجري لِك
وارضي سؤال جواكِ واجاوبِك
وعيني في عينِك
ها تفسرلِك
نظرة فـ نظرة .. ازاي شوفتِك
شُفت طبيعتِك
أصلِك .. طِيبتِك
كُل صِفاتِك .. كُل مَلامحِك
حاجة تجنن .. يخرب بيتها
من رقتها ... أنا حبيتها
:
بيني وبينِك فرق سنين
لما بشوفِك
يجرو .. يدوبو في غمضة عين
صورتِك .. صوتِك
صُورتِك .. صُوتِك كلُ وجودِك
خَلَو النبضة فـ قلبي اتنين
يا اجمل مُهرة
بتجري في قلبي
خليتي قلبي . مارثون . دِربي
:
بيني وبينِك فرق سنين
لما بشوفِك
يجرو .. يدوبو في غمضة عين
:
أنا مش عارف
إن جَه بوكرة إيه ها يكون
امشي الخطوة
ولا الخطوة وراها جنون
وأنا مش عارف
اللي ما بينا واخدنا لفين
واقع .. حلم
ولا غشاوة
فوق العين
:
يحيى معوض
الارز