مسحراتي (2)
اصحى يا نايم
واوعاك تكون .. نصاب وحاوي
ربك كبير ... ربك كبير
ويا الضمير
قولي يا مؤمن ... فيه ايه يساوي
رمضان كريم
:
قالو في الحكاوي
ناس في العلالي
سارقين بلادك .. ناهبين بلادي
وكل ضاع
حقك وحقي .. مالك ومالي
لو كان حلال حلال وليهم
لو احتيال .. حرام عليهم
:
قالو في السياسة
في الدنيا لِعبة
حيتان بتلعب حكام فراودة
الأرض ملعب .. والكورة إحنا
خِسرنا .. ياما .. لِعبو في قَوتنا
اللعبة طالت .. طالت غَموسنا
:
يا عم نور
عَمر بابور .. سخن رغيفك
الله وكيلك .. ما تمد ايدك
تعطش تجوع .. بلاش دموع
قشر في ثومَك واهري في فولك
وكل براحتك
قبل الحكومة .. ما تغلي قمحك
والقرش الابيض ما يخطي جيبك
رمضان كريم
:
اصحى يا نايم
بطل تشخر
وود جارك ... اسال وِشِقر
الغلب مايل عليه وطايله
والفقر بردك .. عامل عمايله
رمضان كريم
:
عامية
يحيى معوض الارز
( يتبع )